盤房來料丨恒指250日線關鍵支持失而復得

Nvidia雖然交出一份靚仔業績，但市場反應冷淡，加上美國債息及國際油價一度反彈半成，美股周四早段回吐，道指低開25點後，跌幅擴大至最多311點，低見49697。其後又傳伊朗與美國就和平協議達成最終草案，刺激道指一度倒升372點，高見50381，不過伊朗官員否認達成協議，但兩國分歧縮窄，道指升幅收窄，收市仍創歷史新高；標指最多回落0.59%，納指一度下瀉0.88%。收市道指報50285，升276點或0.55%；標指反彈12點或0.17%，報7445；納指微漲0.09%，報26293。

雖然噚日美股三個指數表現較為反覆，但阿Man手上股份嘅表現，又無太受個市影響，ALAB賣仔莫摸頭，但望見佢股價再爆到盤後見300，真係眼淚在心裏流。好彩MU又游水成功，早段部分沽咗755，700又買得返，呢隻盤中有啲波幅幾好炒。INTC、NBIS、CRWV全部唔郁住，暫時都係向住目標出發。GOOG加咗382一注，持有先，NVDA返而想睇下有冇200邊炒下range，200/210至240/250炒上落。其實NVDA業績好，估值嚟計亦唔算貴，不過市值已屆巨無霸級別，好難好似之前咁，炒高五成或一倍，就只有趁況上落，炒下range。反而阿Man就喺598買返啲META，利淡消息都出得七七八八，嚟到600邊估值又算平返好多，雖然短期冇乜嘢可以刺激個股價勁升，但公司剛剛進行裁員，績效或者喺下一季度業績開始反映，就當儲下貨，喺580-600之間，先買一注先。ONDS死心不息，又喺9.08買返，都係炒住range先，暫時係9至12兩邊炒，防守位8至8.5，上面11.5-12短線阻力。

至於NQ繼續玩大波幅，盤中曾回落至29100水平見支持，其後喺29200至29400之間上落，至後段再回踩個分水嶺29300企穩，到盤後時段扶搖直上，更一度高見29600水平。今晚NQ個好淡分水嶺喺29450，支持29350/29250/26150，阻力29550/29650/29750-29800，打爆個29800破頂就唔估頂住，但要發力再上，29600呢幾日個初步阻力要企穩先。

港股昨日表現令人失望，雖然恒指高開182點，見25833，經已係全日高位，開市即反覆下跌，午後最多跌309點，收市跌264點或1.03%，報25386，再度失守全部移動平均線，包括較重要支持250日線更首次跌穿收市。成交額增至2985億元。港股昨日跟亞太區其他市場大相逕庭，除因為A股午後急跌外，本身亦因為內地著名投資者段永平，以及股神畢非德旗下巴郡，於上季度已全數清倉阿里巴巴(09988)，影響投資氣氛。

至夜期時段，夜期表現同樣反覆，早段曾有消息指伊朗最高領袖下令該國接近武器級濃縮鈾不得運往國外，曾刺激紐約期油急升，而債息亦高企，消息曾拖累夜期一度低見25250水平；其後再有消息指該傳聞不屬實，更傳出伊朗與美國就和平協議達成最終草案，刺激美股三大指數掉頭回升，夜期亦隨之回升，較昨日收市高水逾百點，重返25500水平之上收市。

恒指高開255點，報25641後升勢略為放緩，升幅一度收窄至96點，低見25483，其後好友再度發力，大市隨外圍股市做好及A股回升再發力向上，成功收復250日線，最多升324點，高見25710。恒指半日升309點或1.22%，報25696，不過半日成交額只有1356.69億元，可能同長周末前夕，投資者傾向審慎有關，而北水更加保守，見今日個市回升，又將早兩日低位撈嘅部份貨沽出，半日錄得淨流出23.36億元。暫時港股若能企穩25600水平，守住250日線，再收復50日線約25750至25800企穩，下周或有機會延續反彈，挑戰下一阻力20日線約25950-26000，不過100日線26100阻力仍大。

麥狄文

(徐狄怡‧證監會持牌人)