盤房來料丨內地有關對外投資新規下港股暫難有起色

美國晶片重磅股博通(Broadcom)收入指引遜色，引發人工智能(AI)交易過熱憂慮，資金由晶片股流向金融等舊經濟板塊，美股周四個別發展。道指高開299點後，升幅一度擴大至970點，破頂見51657點，收市亦創歷史新高，道指收市升874點或1.73%，報51561；標指升30點或0.41%，報7584；納指則跌23點或0.09%，報26830。AI交易疑慮亦影響亞洲股市，今早日本及韓國股份相關股份顯著回調。

雖然噚晚啲科技股表現麻麻，但盤前撈嘅平貨，好似MRVL撈280嘅，又喺320走得甩，咁有執返佢10%，今早盤後又中返個298買盤，繼續hit and run，短炒住先。MU噚日諗住個1050守到，結果一穿就喺盤前插水落到970-980附近，相比1080個落車價插水10%，梗係撈返注又試下978，1050企唔到，1030止賺咗，排返個960再買，用個900至930做防守睇住先，望佢今晚反彈上返四位數。NBIS補返240嘅一注，貪心放喺270食唔到，暫時個250好似又守住，咁又再睇睇先。

DELL喺408撈嘅貨，擺428又走得甩，又排返個408上返車，但要睇緊少少，400穿或者要避一避。MRVL喺280無限輪迴，上到320有10%又要食下糊，今早瞓醒見300邊，分別放咗個298同278買盤，暫時中返個298先，都係用個270做防守。早兩日提到KLAR有17樓下搵位上車，16.8買盤排咗幾日卒之上到車，暫時用16做防守。CRWV補返108嘅貨，102防守無穿，暫時持有。至於GOOG有反彈，不過仲未上返380當然唔係太放心，但中線嚟講有信心，GOOG係可以上返400。AVAV企到200持有先，總之180個防守位再容有失。NQ暫時喺30000至30800個range應該要做下整固先，今晚分水嶺喺30300，支持30200/30100/30000，上方阻力30400/30500/30600。

港股持續調整，噚日恒指低開167點後跌勢持續，跌幅一度擴大至445點，低見25188，重返周一開市水平，收市報25253，跌379點或1.48%，成交額於跌市中減至2702億元。恒指今早低開67點，早段跌幅曾收窄至37點，雖然A股表現唔錯，但阿爺搞完啲違規境外投資，又着手搞埋啲內地人來港開戶口同保險戶口，搞到友邦(01299)連續兩日插水，今早連大笨象(00005)都頂唔順跌咗3%，咁搞法個指數邊有得升。早段見25216就掉頭，接近中午向下考驗兩萬五關口，早市尾段最多跌226點，低見25026。恒指中午收報25047點，跌205點或0.81%。國指跌35點或0.42%，報8466；科指跌61點或1.24%，報4913點。

留意今日收市前會有恒指rebalancing，成交應該會臨尾暴增。暫時大市缺乏利好消息，而外圍股市於高位震盪，港股之前未有跟外圍股市創新高，但喺其他股市高位調整之際，反跟隨下跌，但由於港股估值相對偏低，估計於25000水平或有一定支持。不過技術走勢方面，周三及昨日恒指再度失守全部移動平均線，技術層面下再度轉弱，一旦今日持續下跌，進一步跌穿周一低位約25180水平，25000支持將變得更為脆弱，大市往上月低位約24700至24800水平尋找支持機會增加。

至於反彈方面則面對重重阻力，暫時幾條移動平均線由支持變成阻力，首個阻力為10日線及5日線約25450-25500，而昨日亦遺下一個下跌裂口25499至25569，料亦為阻力；下一阻力為250日線、50日線及20日線約25700-25800水平。恒指如無法盡快收復20日線，重返日線保力加中軸上方，則調整持續，要扭轉目前弱勢，至少要重返25800水平之上運行。

麥狄文

(徐狄怡‧證監會持牌人)