盤房來料丨港股連跌六個交易日成套現提款機

美伊談判未見進展，不過以色列暫停攻擊，令油價大幅回落，紐約期油跌穿90美元水平，美股周二早段高開，但科技股再捱沽，似乎去槓桿未完成，美股周二大幅波動，道指盤中高位與低位點數波幅達到1049點，納期則一度跌逾3%。

道指早段曾升最多474點，高見51260，其後倒跌574點，低見50211，收市道指轉升86點或0.17%，報50872；標指跌19點或0.26%，報7386；納指最終收市跌幅收窄至250點或0.97%，報25678。美股如此波動，跟美伊局勢有關，雖然特朗普揚言美伊將於幾日內達成最終停火協議，但伊朗卻因為以色列未有停止施襲，擊落美方直升機，美方隨即報復，不過最終以色列停止向伊朗再發動攻擊，局勢稍為緩和。

美國銀行策略員Savita Subramanian警告，愈來愈多熊市訊號顯示股市即將見頂，投資者係時候沽貨獲利，高市盈率股份跑贏低市盈率股份幅度擴至歷來最大，顯示市場出現過度投機。該行標指今年底目標為7100點，低過周一收市價7406。

以色列與伊朗最新衝突告一段落，加上中國5月石油進口減少，拖累紐約期油重挫3.4%，每桶收報88.2美元。不過BMO資本市場首席外滙策略員Mark McCormick認為，交易員過早消化中東戰爭得到解決預期，稱即使衝突結束使油價回落，通脹影響仍會持續，並將推高全球利率且導致經濟放慢，相信該情況利好美元。目前市場唔少人已預期美聯儲局或於第三季開始加息，而加息與否取決於美伊局勢變化，如雙方能達成永久停火協議，霍爾木茲海峽能回復正常，油價供應回復正常，油價重返美伊開戰前水平，方有機會逃過加息一劫。而今明兩晚美國將公布CPI及PPI數據，或能為下周聯儲局息率路徑提供指引。

噚晚美股大坐過山車，DELL、MU同MRVL盤前沽咗都唔係太可惜，盤中見插得急，DELL喺363撈少少；MU分別中咗928、880同860三個買盤；MRVL就249接咗啲。930減咗三分一MU，另外三分一喺908 止賺埋，至於860嗰注比較接近條20MA，就先持有先，反正MU短炒咗幾次，接近20MA輸極有個譜。DELL見彈力一般，盤中上到373同盤後380落車先。MRVL都係炒黃仁勳效應，249接完，270減咗半，255係條10MA，keep住一半睇定啲再算。至於NBIS又真係去到235，順利落車，盤中見隊到200邊，203撈返小小，咁樣游水有成10%以外差價，撈返小小用200做防守睇住先。INTC狗衝100嘅，見有10%， 110食咗先講，擺咗個101.5接貨，又接返半注。ONDS、KLAR同GOOG繼續持有，除咗KLAR，另外兩隻都係低位炒上嚟，ONDS食過糊，又得返三分一嘅貨，暫時唔郁住。NVDA擺咗個200買盤都中咗，呢隻講過可以炒吓range 200至240，嘅然到range底，接返少少博反彈。

NQ大坐過山車，29700-29800呢啲位繼續係阻力，反彈到呢啲位企唔穩，穿上周五低位直插到10周線約28300，假穿一下先反彈，不過美股彈力點都勁過港股多多聲，盤中一度彈到29100之上，但又上唔返條30MA 29250同5MA 29350，再度掉頭向下。暫時亞洲時段NQ落返28800-28900水平，大家都係等緊個CPI同PPI。今晚NQ分水嶺28800，下方支持28700/28600/28500/28400，上方阻力28900/29000/29100/29200。

恒指已連跌五個交易日，昨日低開105點後，跌幅最多擴大至170點低見24486，接近周一低位後見支持，其後反彈至最高24740，收市報24565，跌91點，成交額3089億元，北水持續錄得淨流入。不過至夜期時段表現反覆，早段跟隨美股反彈，夜期一度逼近24700水平，其後美股急轉直下，納指曾跌逾3%，夜期一度低見24200水平，其後納指跌幅大大收窄，夜期從低位反彈逾百點，但仍較港股收市跌近200點，ADR則跌穿24300水平，而今早黑期則於25400水平徘徊。恒指今早低開低走，一度跌逾300點，失守24300水平，上半場收市跌272點，報收24292。半日成交額1700.27億元，北水繼續錄得淨流入60.31億元。

港股已連跌六個交易日，暫時恒指喺24000-24200料有不俗支持，而至此水平，月波幅亦達1800-2000點，有望喘定並展開反彈。至於反彈阻力方面，初步阻力仍為24700，下一阻力為裂口24837-27928，即24850-24950將再遇阻力。除非短線港股能重返25000水平企穩，則反彈可持續，但上方多條移動平均線，分別為5日線約25000，10日線約25200及5周線25250，20日線約25550，及250日線、30日線及50日線交滙處25700-25750均為阻力，博反彈未宜太過取進。留意今明兩晚，美國將公布CPI及PPI數據，兩數據將為下周聯儲局重要參考指標，料市況隨市場對數據反應而波動

麥狄文

(徐狄怡‧證監會持牌人)