盤房來料丨港股易跌難升格局暫難扭轉

美國與伊朗確認已簽署停戰諒解備忘錄，將重新開放霍爾木茲海峽，美軍亦解除對伊朗海上封鎖，市場憧憬海峽航道回復正常，國際油價周一大幅滑落至3月初以來低位，紐約期油跌至80美元水平附近。美股造好，道指早段勁升超過700點刷新紀錄。道指高開162點後，升幅擴大至最多734點，收報51671，升468點或0.92%，創收市新高；標指升122點或1.65%，報收7554；納指勁升907點或3.07%，報收30543。

SpaceX上周五首掛，股價升近兩成，噚日再升多近兩成，上周五阿Man完全無參與過SPCX炒作，噚日當然要參與一下，開市即狗衝170美元，順手用個160美元做止蝕，再掛一半貨喺220美元就無再睇，瞓醒220順利沽咗半，另一半用個190做防守睇住先。貴為全球第六大市值公司，上市最快15個交易日就以快速通道加入納指100成份股，屆時再有追納指數嘅基金被動買入，呢段時間都係SPCX蜜月期，回得急就撈下貨，短炒每轉執佢幾個%應該無問題。

至於其他短炒貨，MU同MRVL忍唔住，分別喺1054同293沽咗一半短炒貨出街，開市無耐413減咗一半DELL，255亦食咗一半NBIS，INTC喺103撈嘅貨，130沽出一半；KLAR等到頸都長，17.8減返三分一貨，其餘就無再有其他動作。基本淨低嘅貨定過抬油，留一半讓子彈飛，暫時點睇美股都係一急跌撈貨，5日線、10日線係參考撈貨位，20日線更加係非買不可。NVDA自2021年以嚟首次發債，3倍超額認購，股價升3.5%，呢隻短炒200撈嘅貨，想等下有冇上返220先食糊。美伊停火，除咗油價急跌，金價相反急抽，重上4300美元水平，暫時金價上方阻力4400/4600，就算美伊局勢緩和，金價都未必可以重返5000美元。

摩根士丹利策略員Michael Wilson認為，中東解決方案將促使債券市場解除對聯儲局加息預期，有助增加股市牛市延續機會。佢預計，投資者換馬吸納伊朗戰爭後走勢落後嘅周期性及對經濟敏感的股份，料可為美股帶來額外提振作用。不過美股目前估值確係唔平，短炒部份防守位要睇緊啲，至少阿Man坐住好多年，長線投資嘅美股，雖然數量唔多，但全部都已經係免本或負成本，咁呢啲長線投資，未到退休要用錢，都唔會點郁住。至於短線波動，短炒貨都係且戰且走，美國呢個星期議息，要睇新官上任係咪三把火，斷估Kevin Warsh同侵侵都係friend底，唔會一坐上聯儲局主席個位就放鷹，今次議息會議預咗息率維持不變，但會議紀錄某程度上將反映下半年息率路徑。

至於港股真係死到直一直，噚日因為美伊達成協議，各地股市歌舞昇平，道指更創新高，但可憐港股最叻見咗一下25000就無以為繼，收市落返24800水平，日線以全陰收市，以為夜期時段可乘美股強勢彈返上去，結果25000無影，都係落返24800水平收市。今日恒指低開16點後拾級而下，最多跌361點低見24480，半日跌309點，報收24533，失守24600呢個近日嘅密集區頂部，情況岌岌可危。

雖然噚日港股反彈，但以全陰燭收市，若然今日情況繼續二連陰，仲要上唔返24600收市，睇怕再向下考驗24000支持機會仍大。至於上方反彈阻力重重，先係25000大約條10日線水平，而25150條20日線又係另一個阻力，30日線25500同50日線25672仲有250日線25720，就係能否成功突破下降軌嘅關鍵。一句講晒，港股暫時跟跌唔跟升呢副衰樣仍未改，資金只係集中炒個別AI概念股，無新資金流入嘅情況下，北水短線出出入入，港股易跌難升困局暫難扭轉。

麥狄文

(徐狄怡‧證監會持牌人)