盤房來料丨港股指數表現仍疲弱 資金集中炒個別股份

市場憧憬中東地緣政治局勢緩和，國際油價回落至80美元之下，加上債息回落，不過美股周二個別發展，道指再破頂，盤中曾首次突破52000關，高見52190，收市亦創歷史新高，報51999，升328點或0.64%，報51999；標指跌42點或0.57%，報7511；納指跌307點或1.15%，報26376。

新股SpaceX掛牌後股價連升三日，漲幅一度超過17%，盤中SPCX曾高見225.64美元，市值超越亞馬遜及微軟，直逼3萬億美元，股價收市報201.68美元，升幅放緩至4.77%，市值為2.65萬億美元，超過亞馬遜成為全球第五大上市公司，但仍落後於微軟。SPCX噚日盤前沽咗220一半貨之後，身痕又短炒接返208、202同198走去買返啲，今朝彈唔返上210樓上，208沽返半出去，繼續用190做防守炒住先，都信喺加入納指100成份股前，仲可以炒住先，不過留意220-230應該有阻力，短炒喺195至225炒住range先。

CRML減咗半10.48，又等下有冇9元邊撈返；DELL盤中上過420，不過413減咗半，等下有冇5日線同10日線附近大約395-400，可以補返。MU減咗半1054嘅貨，噚晚見上到1133有少少嘔血，博佢有回返一嚿水補返呢一半，掛咗個1024，諗住沽出價平返30都補一補，竟然瞓醒竟然中咗，博佢彈返上1100，但因為都係高追嘅呢一注貨，擺返個1000做止蝕，手上另一有注係916嘅貨未走，但之前炒出炒入嘅利潤，足已令916呢一手貨拉平咗一本持貨成本。至於其他貨就無加無減，NBIS食咗半255，想買返平少少都無，留低嘅貨將個止賺推到250，繼續持有，破頂例牌唔估頂。

 

NQ2609果然去到30900喺31000大位前止步做回調，落到今朝一度低見30300，留意30200係回調初步支持，剛好係條5日線，若然穿呢個位，或者要退守去條20MA同10MA，分別喺29900同29700左右。至於今晚NQ個分水嶺係30400，支持30300/30200/30100/30000；阻力係30500/30600/30700/30800。

 

留意今晚聯儲局主席沃什(Kevin Warsh)主持上任後首個議息會議，美國10年期債息一度回落5.3個基點，報4.412厘，對息口較敏感嘅2年期債息降2.52個基點至4.0411厘。美滙指數最多回升0.16%，高見99.791，其後輕微倒跌；雖然日本央行一如預期加息0.25厘，但日圓保持疲弱，最多跌0.09%，報160.49兌每美元。雖然唔少市場聲音都估計下半年美國或有機會加息，但斷估Warsh首次主持會議唔放鴿都唔會放鷹，可能畀個中性少少嘅comment，加上油價都回返落80美元樓下，有助緩解通脹壓力，下半年美國又未必一定要加息。

 

港股上周反彈兩日後，本周兩個交易日表現麻麻，雖然周一回升，但卻高開低走，開出陰燭，昨日則低開低走，恒指跌幅一度擴大至463點，低見24378，幾乎將反彈升幅蒸發近四成，收市跌幅收窄至348點，報收24493，又再失守全部移動平均線。幸而兩個下跌交易日減交均見縮減，反映沽壓唔算太嚴重。不過自美伊宣布本周五將簽署停火協議，中東地緣局勢緩和，國際油價及債息回落下，港股反彈力度相對其他股市明顯偏弱，港股反彈面對阻力重重，而最基本要先企穩5日線及10日線，並重上20日線，並突破下降軌25500阻力，港股方能改變目前一浪走低一浪嘅形態。

 

暫時反彈阻力為10日線約24778及20日線約25138，而50日線及250日線約25700水平阻力更大，要扭轉目前弱勢，除要突破下降軌外，並要收復所有移動平均線，即重返26000水平，方能扭轉自5月展開跌浪，再展升浪。至於短線支持為24400/24200/24000，一旦再跌穿上周底部約24000水平，下方支持為23800/23500。由於今晚聯儲局議息，料今日港股表現較為牛皮，市場靜待議息結果。

麥狄文

(徐狄怡‧證監會持牌人)