盤房來料丨港股反彈頭肩頂頸線或由支持變阻力

中東戰火漫天，美股隔晚低開，早段顯著受壓，道指低開183點後，跌幅一度擴大至599點，低見48377，其後拗腰回升，一度倒升86點，高見49064，最終收市報48904，跌幅收窄至只有73點或0.15%。至於標指跟納指一度跌逾1%，但收市兩指數倒升；標指升2點，報收6881；納指倒升80點或0.36%，報收22748。重磅股低開高走，噚日提到要吼位撈Nvidia(NVDA)，結果如願以償，正正係175美元至178美元任你買，收市上返182美元，雖然盤後又回返去180美元左右，但都算搵到個好位上車，總之NVDA仲喺區間移動，防守位170美元，阻力位210美元，中間三四十美元炒上落，其實都幾好炒。

市場憂慮中東石油輸出受中東戰火干擾，紐約期油高見75.33美元，雖然其後升幅削半，但目前紐約期油仍高企於70美元之上，石油股造好。除咗石油股，軍工股亦有追捧，洛歇馬丁(LMT)升逾3%，盤後再升1.2%，不過戰事會持續幾長仍有變數，無貨暫時唔建議追貨，食下花生算數。至於一向有炒開嘅ONDS，上過12美元叫咗可以隨時起筷食糊，有食嘅下家落返10元邊嘅話，又可以吼位撈返短炒，繼續用個8.5-9.5做防守，上方阻力仍然係12.5-14左右，又可以幾蚊炒上落，一半貨長線等佢破14個頂，另一半用嚟炒上落降低持貨成本。

NQ噚晚去到24400至24600兩個支持位就反彈，開市後企返個24700分水嶺就反彈，盤中彈到去25000-25050呢啲阻力無以為繼，暫時呢個位仍然有阻力。今晚NQ個分水嶺喺24900，上方首個阻力25000-25050，下一阻力25150-25200；盤中最大阻力係25300。首個支持為24800，下一支持24650-24700，盤中較大支持係24450-24500。

中東戰火漫天，港股3月開局受壓，恒生指數昨日低開324點後，跌幅一度擴大至747點，見25882低位，午後跌幅收窄至570點或2.14%，報收26059，險守二萬六關，成交額增至3576億元。不過至夜期時段，美股低開高走，標指跟納指更倒升收市，帶動港股於夜期及ADR反彈，重上26100關之上。今早黑期於26100水平之上徘徊，恒生指數高開130點，早段最多159點至26218，但A股早段顯著下跌，拖累港股反彈受阻，恒指其後倒跌，低位一度跌151點至25907，半日跌幅削半至74點或0.28%，報25985，半日於26000關好淡爭持；國企指數跌26點或0.3%，報8675；科指跌50點或1.01%，報4938。

預期中東局勢本周將持續動盪，而恒指昨日顯著跌穿26300關鍵支持位，技術走勢轉差。恒指自1月起已呈現頭肩形態，噚日都講過，失守26300頸線支持，以量度幅度計算，或要下試25100/24600方能完成調整。當然恒指噚日第一日收於26300之下，如短期內能重上此水平企穩，為逆轉目前弱勢關鍵，否則向下壓力加大。暫時恒指1月份低位25630並未失守，25600-25700可視為首個支持，而下一支持為去年底低位約25000-25100。

留意全國兩會將於明日召開，今年兩會焦點為審議國家「十五五」規劃綱要草案，市場並以此推算今年中國GDP目標，投資者亦憧憬內地會否再有政策加碼扶持經濟。不過，中東局勢緊張下，油價高企或推高通脹預期，將削弱減息空間，未能進一步放寬貨幣政策，對科技股尤其不利。個股方面暫時無乜心水，重磅科技股等埋本月出咗業績再考慮都未遲，尤其恒指頭肩頂形態如確認頸線失守，即使大市唔急跌，亦有機會反覆向下考驗25000-25500水平，暫時似乎易跌難升。

麥狄文

(徐狄怡‧證監會持牌人)