盤房來料丨港股反彈暫受制10日線阻力

市場擔心美伊衝突將變為持久戰，令中東能源輸出繼續受阻，國際油價一度爆升至接近120美元，消息喺噚日震散全球股市。美股早段都低開低走，不過G7進行電話緊急會議，表示必要時釋放戰略石油儲備，其後特朗普更表示與伊朗戰爭可能即將結束，油價急速回落，美股則掉頭轉升。美股道指周一低開130點後拾級而下，跌幅一度擴大至最多886點，低見46615，其後油價回落，侵侵又話快結束戰事，美股拗腰反彈，一度回升374點，高見47876；標指最多跌1.54%，收市反彈55點或0.83%；報收6795；而以科技股為主的納指一度跌1.45%，收市倒升308點或1.38%，報收22695。

俗稱「恐慌指數」的VIX波動指數曾抽升19.7%至35.3，尾段一度倒插16%，至25以下水平。紐約期油一度飆高31.4%，每桶高見119.48美元，布蘭特期油曾炒高28.9%，至119.5美元，其後兩者一度轉跌超過10%，於今早亞洲時段進一步回落至85美元水平，但中午又重返90美元附近，未有耐重返美伊戰爭前水平。

雖然噚晚早段美股插水，但阿Man嘅美股組合，幾乎全部都守得住啲支持位，咁就觀察住先，唔加又無減貨，若然今晚反彈，可以考慮拎少少貨出嚟flip下，炒住上落先，RDW、ONDS之前都畀咗個range，跟返個range拎部分貨炒上落，可以減低持貨成本。

至於NQ噚晚相當精彩，開市後守到個24050分水嶺，就一路反彈到24400/24500見第一個阻力回返少少，去到24300守到又再上；直到侵侵話美伊戰爭或快結束，就頭也不回咁上到接近25000先有阻力，暫時NQ喺高位徘徊，今日個分水嶺喺24950，下方首個支持24800-24850，下一支持喺24650-24700，大約係條10個月線，至於盤中最大支持係24400，即係噚日嘅阻力位，將會變成支持位。若然企得穩25000，咁上方首個阻力喺25150-25200，下一阻力喺25350-25400，呢個位啱啱係條50日線同100日線滙聚區，要企返穩先可以扭轉弱勢。

至於港股昨日雖隨外圍下跌，恒生指數早段低開再跌穿25000關，最多跌851點，見24906低位，又一次考驗250日線後即反彈，但午後北水大力掃貨，更錄得單日最高淨流入紀錄，最終跌幅收窄至348點，報收25408，不過成交額增至3923億元，反映有買盤趁低吸納。目前美伊仍未停火，但特朗普先放風指美伊戰事將結束，令油價急回落，股市大幅反彈，隔晚夜期已見回穩，而ADR更重上25800大關。

今早黑期回升幅度未及ADR，僅於25600水平徘徊，但今早恒指高開331點，升幅擴大至464點，見25872半日高位，半日升396點或1.55%，報25804；國企指數升91點或1.07%，報8673；科指數升69點或1.39%，報5010。主板成交1720億元，以半日升近400點嚟講，呢個成交額都唔叫算好配合。半日叫守住條5日線即大約25500水平，暫時未能成功挑戰10日線約25920，預計呢個水平會有啲阻力。港股能否擺脫劣勢，第一步都要企返穩條10日線，重上26000水平，再睇下能否重返20日線之上，即重上26400水平。至於下方支持，則留意25500今日能否企穩，如未能企穩，則下一支持為25300及25100。

個股方面，開源人工智能體OpenClaw掀熱潮，人工智能模型兼半新股MiniMax(00100)延續強勢，再升9.5%，企穩1000元進身金牛股。圖像處理器(GPU)相關股天數智芯(09903)升19.9%；智譜(02513)半日亦炒高逾半成。想追呢批股份無話唔得，畀個止蝕價追入，天數智芯用返個290做防守，智譜防守位600，MiniMax用返個1046開市價做防守。阿Man就一向有畏高症，反而想吼返網易(09999)，184至188元買入，用返個175至180做防守，博啲科技股扭轉弱勢，短線先睇佢上返200元，企得穩200元先再算。

麥狄文

(徐狄怡‧證監會持牌人)