盤房來料丨恒生指數短線20日線見支持

特朗普下令海軍向霍爾木茲海峽布雷船隻開火，加上伊朗首都德黑蘭啟動防空系統應對小型無人機，國際油價持續高企，紐約期油又上重上90美元水平之上。美股周四反覆受壓，道指低開205點後，跌幅擴大至最多628點，低見48861，收市道指跌179點或0.36%，報49310；標指跌29點或0.41%，報7108；納指最多跌1.82%，尾市跌幅縮至0.89%，報24438。

RDW到12元食半留半，竟然一開直落，畀埋個10元上返車，盤中一度穿過10元，不過9.5守到，盤後又上返10.2元，短跑應該成功。CRWV減咗半貨123，但又未去到想回補嘅位，都係想吼返低少少，睇下有冇115樓下。NBIS守到150，仲有一半貨再等下。ONDS減咗半11.5，噚晚又真係去到10至10.5啲補貨位，10.25撈返半，繼續炒上落。走漏眼係Intel，阿Man一向好少博業績，估唔到業績後大爆發，盤後股價急升兩成，主要係管理層指CPU將會強勁增長，生意好到不得了，但係錯過就錯過，無貨唔追貨。大摩就有報告指，博CPU股即係AMD同INTC嘅話，倒不如買返記憶體股，即係MU。MU其實現價都唔平，但美股嘅特色係，好嘢唔會平，平嘢唔係好嘢，信大摩就等MU回到450至470搵位上車，不過上面490-500可能又見阻力。

至於個NQ又創多個歷史高位27155出嚟，叫做去到噚日阿Man畀嘅第二同第三個阻力位之間。創完新高後一度插水，穿咗個5日線位26850-26900，失埋個分水嶺就直落，去到噚日畀嘅支持位26600-26700之間，呢個亦係提到嘅較大支持，26700好快守返又上返去接近27000，都咪話唔厲害。今晚NQ個分水嶺喺27000，又高咗一級，支持25900/25800/25700，阻力27100/27200/27300，初步支持25900係條5日線，一路踩住條5日線收市唔穿，暫時仲係拾級而上嘅格局。

港股噚日低開低走，恒指低開64點後，一度跌322點，低見25840，全日跌248點，報25915，險守50日線，但跌穿10日線及100日線，並失守二萬六關。至夜期及ADR時段進一步回落，跌穿50日線，夜期更一度低見25650-25700水平，落埋條20日線就反彈。今早恒指低開181點，早段跌幅最多275點，低見25639，剛好係20日線附近即反彈，半日上返25862收市，跌52點，睇嚟條20日線有不俗支持。但唔上返50日線同100日線收市企穩，仍然未脫險。上周五投資者趁美伊周末或再進行談判前，先行鎖定利潤。

本來美伊已講掂數，同意停火，伊朗重新開放霍爾木茲海峽，並且承諾永不封鎖該海峽。言猶在耳，唔夠48小時，以色列未有理會美伊協議，繼續襲擊黎巴嫩，未有符合美伊原本協議停火安排。其後美伊就海峽控制權繼續僵持，但特朗普又指延長停火。投資者已漸習慣中東局勢反覆消息，開始回歸基本面，但喺美元走強下，重磅科技股暫時無乜運行，令指數停滯不前。估計港股又進入牛皮偏軟局面。由於下周期指結算，下周開始進入轉倉高峰期，除非中東局勢有突破性發展，否則喺霍爾木茲海峽未能完全通行，油價維持高企下，港股只會有波幅，冇升幅，能守住20日線即25600水平，就隨住中東局勢消息喺幾條移動平均線之間上落，短線26300-26500阻力仍大。

麥狄文

(徐狄怡‧證監會持牌人)