盤房來料丨港股能否扭轉弱勢還看250日線

美國新聞網站Axios報道，美國與伊朗達成協議延長停火60日，但仍有待美國總統特朗普批准，美股周四先跌後回穩，標指及納指盤中齊破頂，收市與道指都創歷史新高。美市收市，道指報50668，升24點或0.05%；標指升43點或0.58%，報7563；納指漲0.91%，報26917。噚日美國公布咗唔少重要經濟數據，當中嘅重中之中核心個人消費開支平減指數(Core PCE)按年升幅由3月3.2%略加快至3.3%，符預期，按月只升0.2%，低過3月及預期0.3%增幅，而4月份個人收入維持不變，低過預期升0.4%；估計6月份聯儲局議息維持息率不變機會大。

美股繼續精彩，MU夠膽一回到支持位就掃貨，好似噚日見個880無穿過，900美元又撈少少嚟短炒，即晚又畀5%即日鮮回報你，執豆咁執。只要肯買落去就有，MU有咁嘅膽量再撈貨，多得UBS份報告將佢個目標價大幅調高到1600美仔，打返個八折，都有1200，咁900呢啲位，先會再有動力去撈貨。至於CRWV心大心細仲未落車，係咪一定要死跟段永平，都係睇住個100防守再作打算。至於KLAR未搵到位上車，排咗個16.8無見過，唯有今晚再睇睇。NBIS同INTC持有決定不變，總之防守位之上，無乜威脅就唔理住。ONDS爆咗頂，忍唔住喺12.8沽咗部份貨套利，剩返嘅貨又放飛，一個唔覺意畀侵侵睇中，入股間公司，爆升可期。

Space-X上市在即，諗緊係咪可以炒下呢殺航天相關板塊股份，噚晚買咗少少PL，48.89先買一注，即晚就上返50樓上，分注買入，43-45有機會加注，用個40美元做防守。META急升完，短炒嘅其實喺630-650食咗先無壞，再有600-610又撈返，呢隻好似可以炒住range先，畢竟公司嚟緊兩三年開支唔細，再無其他利好消息，升返到630-650或者又要整固下。

以為NQ都係時候調整一下，結果噚日盤前個29800分水嶺守到，開市後又拾級而上，盤中最高到30350水平，完全打爆晒噚日幾個預期阻力位。今晚NQ分水水嶺為30300，支持30200/30100/30000，上方阻力先唔講，企到個30300，分分鐘再破頂。但今晚如果穿返個30000/29800，咁有心理準備調整，回測10日線大約係29600有較大支持。

噚日港股真係嚇人恒生指數低開97點，開市價25230已成為昨日高位，其後持續走低，最多一度跌600點，低見24727，午後A股反彈，港股跌幅收窄至322點，二萬五關失而復得，收市險守二萬五，報25006，成交額3563億元。幸而至夜期時段有反彈，而短線技術指標都見嚴重超賣，反彈下都係正常。今早港股高開155點，半日升275點，報收25281，成交額1941億元。噚日有提過個市最好守返個24800，結果盤中穿過呢個位都反彈上返25000收市，可以算係短線完咗呢一波調整，開始行返個反彈浪。

不過反彈方面，恒指今日收市要守到25250-25300，先有機會持續個反彈。上方反彈阻力25350條5日線，下一個位係250日線即係25650同50日線25750，至於20日線25900至26000呢啲位，一路上唔返嘅話，港股都係維持弱勢。重點係至少要企返條250日線25650幾日，先可以解除向下尋底嘅危機。

麥狄文

(徐狄怡‧證監會持牌人)