盤房來料丨港股反彈能否持續取決於美伊局勢

雖然CPI及PPI數據反映通脹仍威脅，通脹持續高於聯儲局目標，市場對於下半年加息預期升溫。不過油價仍存較大不確定性，前美國財長耶倫出席東方匯理投資論壇時表示，未來數月美國唔太可能加息，但減息理由亦已消失。有耶媽嘅定心丸，就算唔減息都未需要加息住，美國債息回落，美滙指數亦回落至100之下，加上美國總統特朗普一改強硬口風，稱與伊朗剛達成一項解決戰爭問題重大協議，預計未來幾日內將會簽署協議，並取消原定周四夜間襲擊伊朗計劃，美股爆升。道指周三重挫953點，創今年最大跌幅後；周四高開53點，反彈最多1050點，最高報50968，收市道指升929點或1.86%，報50848；標指升127點或1.75%，報7394；納指升640點或2.54%，報25809。

個股方面，MU未開市又忍唔住928食咗868撈嘅MU，以為5MA未必企得穩，就可以喺20MA大約880-900撈返，結果見900企定定，死死地氣喺916補返注，瞓醒有驚喜，今晚睇下有冇咁神上返四位數，暫時呢一注個防守位分別係10MA978同5MA 928，守到呢啲位，當然睇返四位數。MRVL喺250買返嘅貨，到呢一刻收市價280，今晚同樣同5MA270同10MA268做防守，唔企減半先，落返230-250先撈返。

DELL上返接近400，340-360做防守，繼續等。NBIS真係派米股，上到218先執佢5%，又再一次喺208補返嘅貨，竟然瞓醒見到股價升穿埋238，短線220-225做防守，睇下可以行幾遠。ONDS盤後上返10元樓上定返啲，GOOG、NVDA同KLAR同樣企返定，但唔似得MU同NBIS呢啲咁當炒，或者要時間再上。其實炒美股有一個幾容易處理嘅方法，插得勁到20日線必買，升市嘅時候，5日線同10日線都係可以試下買返半注先，20MA做防守，總有位畀你食，甚少甩轆。

NQ真係估佢唔到，早段因為啲消息發上發落，但幾次去到分水嶺28600守到就反彈，然後企埋個28800，結果未到兩點因為侵侵一句TACO唔打伊朗，就直昇機咁飛咗上去。下周四重期結算，噚晚已開始轉炒個2609NQ，NQ噚晚已上移咗1000點，千升過後今晚嘅分水嶺喺29700，啱啱係條10MA同20MA附近，呢個位都幾重要，企唔企到視為後市好淡分水嶺。分水嶺29700，支持29600/29500/29400，阻力29800/29900/30000， 呢期NQ下下五六百點波幅，day trade短炒要嚴守止蝕。

港股連跌七個交易日，昨日恒指早段曾倒升84點，無奈A股及外圍偏軟，港股喺多項指標已逞超賣下仍再轉跌，一度跌408點至23999今年暫時低位，其後喘穩略為反彈，跌幅收窄至158點，報收24249，總算企返3月底部之上收市。不過成交縮水至2885億元，悲觀嘅可以話嚟到24000邊都未見大成交接貨，但樂觀啲睇，沽壓都超化得七七八八，要沽貨嘅都沽晒，無貨可沽。其後至夜期時段，跟隨美股反彈，夜期一度重返24400水平，ADR則回升300點，重返24500水平。

美股爆升，帶動今早港股反彈。恒指高開252點，好友畀淡友恰咗咁多日，終於反擊，早市尾段升幅最多擴大至512點，高見24762，中午收報24740點，升491點或2.03%。國指升167點或2.04%，報8384；科指升79點或1.72%，報4735。大市半日成交1567.09億元，北水淨流入21.31億元，成交未能配合近500點升幅，有啲美中不足。

暫時恒指算企穩24600，後續有望進一步向上回試去年高位24800水平，不過初步25000近條10日線料有阻力，而20日線(25250)及50日線(25650)阻力更大。至於本月暫時月波幅已達2000點，如外圍市況好轉，港股料展開反彈，反彈首個目標為跌幅一半至25000，企穩25000後能否扭轉弱勢，則視乎20日線收復後能否企穩。

麥狄文

(徐狄怡‧證監會持牌人)