盤房來料丨港股勢弱不排除淡友借勢踩多腳

美國與伊朗本周初就結束中東衝突達成臨時協議，國際原油價格大幅回落，有助紓緩通脹壓力。昨晚聯儲局議息會議維持聯邦基金利率目標區間介乎3.5厘至3.75厘，即連續第四次會議按兵不動，符合市場預期，今次為聯儲局新任主席沃什(Kevin Warsh)上任後主持首個議息會議。最新利率點陣圖顯示，官員料今年底利率中位數為3.8厘，高過3月預測嘅3.4厘，一半官員認為今年或要加息，幅度為0.25厘，不過沃什未有提交任何利率預測；官員亦未有提交2028年利率預測，沃什一直公開批評呢個前瞻指引，依家唔畀預測亦唔出奇。

議息結果出爐後，美股轉跌，道指最多回落逾600點，三大指數全線向下。聯儲局結束兩日會議後發表聲明，提到雖然中東衝突帶來高度不確定性，但美國經濟以穩固步伐擴張，生產力增長及資本投資表現強勁；職位增長與就業人口同步增長，失業率變化不大；聲明內已刪除暗示減息措詞。

議息結果公布之前，美股周三早段個別發展，道指低開62點後，掉頭上升最多281點，高見52281，再創新高，不過儲局議息後一度轉跌607點。道指收市報51492，跌507點或0.98%；標普指數報收7420，跌91點或1.21%；納指報收26021，354點或1.34%。富國銀行上調標指今年底目標，從7300點調升至7950點，即較周二收市有接近6%上升空間。該行策略員Ohsung Kwon指出，美伊緊張關係降溫紓緩宏觀經濟憂慮，高油價引發通脹壓力將會消退，市場情緒改善為人工智能(AI)交易提供上升空間。

SpaceX嚟到第四個交易日，早段見過210無以為繼，開市後就一路插水，忍唔住200沽埋手上嘅貨尾單位，今晚再睇睇個190有冇支持，或者個支持位要推落180，無貨就忍忍手先。CRML最低都係落到9.5左右，暫時無加無減，美股明日都放假，呢兩日傾向唔加貨住。DELL反而喺400補返413沽出半貨，瞓醒股價又上返420以上，晏啲睇下有冇破頂，定係425-430要食一食糊游下水。ONDS到家下都仲未上返10元樓上有啲失望，好彩NBIS、MU同MRVL都級級上返，暫時整體個短炒倉都仲係幾靚仔。炒美股有度好，短中長線都有糊畀你食，望返個港股，一個係天堂，一個係地獄。留意返議息後個美滙指數又上返100，對本來已弱勢嘅港股嚟講，完全係落井下石踩多腳，呢個亦係亞太區其他股市今早又飛天，港股又殺穿底嘅原因之一。

今晚美股四重期結算，NQ一定係轉去2609唔使諗，今晚NQ分水嶺30300，支持30200/30100/30000，阻力30400/30500/30600，NQ上得返30600企，先有條件再挑戰高位甚至破頂。港股表現不濟，恒生指數昨日早度雖曾升66點見24560，可惜5日線24523未能企穩即掉頭回落，一度跌239點至24254低位，收市報24312，全日跌181點，成交額2704億元。雖然美伊局勢緩和，雙方已約定簽停火協議，不過內地經濟數據未如理想，港股反彈乏力，資金繼續炒股唔炒市。至夜期時段，聯儲局公布議息結果維持利率不變，但過半數官員暗示今年下半年可能加息，就連一叫大大聲叫減息嘅總統特朗普，亦表現聯儲局可以按兵不動，但亦可能會加息，唔少交易員更推測今年10月或開始加息，美股由高位回落，三大指數倒跌。

夜期及ADR回軟，今早黑期處於24200水平附近徘徊，恒指今早裂口低開166點，報24145，幾乎係半日高位24163，雖然早段A股上升，但港股無反應，其後A股轉跌，淡友變本加厲，大市愈跌愈有，最多跌488點，低見23823，至23800水平有少少支持，加上月波幅已達2200點，恒指略為反彈至23900收市，跌412點或1.7%。半日成交額1644.74億元，北水錄得淨流出7.24億元，或者係端午節長周末假期前，減一減磅都正常。雖然月波幅已達2200點，不過港股表現實在疲弱，由於23500-23800仍有一個重型牛貨區，稍有利淡消息，唔排除淡友乘勢踩多腳，月波幅擴大至2500點亦有機會。要確認23800係本月底部，港股要喺兩個交易日內，重返24100水平企穩，方有條件展開較顯著反彈。

麥狄文

(徐狄怡‧證監會持牌人)