房盤來料丨中東局勢進入長期拉鋸模式

據伊朗半官方塔斯尼姆通訊社報道，伊朗最終決定，唔出席巴基斯坦舉行與美國會談。由於距離美伊停火協議到期僅剩數小時，雙方希望達成可能正式結束戰爭協議落空。受消息影響，紐約期油價格短線急升，紐約期油一度重上90美元水平之上，但至今早紐約期油已重返90美元之下，主要係美國特朗普又再延長停火，但仍封鎖霍爾木茲海峽，令油價仍於高位震盪。而美股則受消息影響，反覆偏軟，借勢回吐。

早段道指一度跌逾400點，但收市跌幅收窄至293點或0.59%，報49149；標指跌45點或0.63%，報7064；納指跌144點或0.59%，報24259。不過美股收市後，特朗普宣布延長停火期限，此舉令美股指期貨反彈，亞太區股市表現冷靜。

雖然噚晚美股三大指數回落，但睇返唔少股份其實表現唔差，亞馬遜宣布向Anthropic追加投資50億美元，若合作達標總投資最高可達250億美元。作為對等安排，Anthropic承諾十年內向AWS採購逾1000億美元算力，將在亞馬遜Trainium芯片鎖定高達5 GW算力，用於Claude模型訓練與推理。亞馬遜股價逆市升0.66%，盤後再升0.76%，已重上250美元之上。由於ALAB係AMZN其中一個關鍵供應商，ALAB亦受惠，噚晚急升近一成，盤後再升2.67%，已經去到197.05美元，呢啲位相比之前撈貨嘅價107美元，已有超過八成回報，諗都唔諗，今朝瞓醒就喺195美元沽貨套利。如果有貨仲想保留，可以留一半將個止賺再推高去180美元。雖然嚟緊兩年甚至三年，ALAB盈利都仍然係高速增長，但長遠嚟講增長應該會慢落嚟。一來個基數大咗好多難以持續維持大比數增長之外，競爭又會大咗，嚟到呢啲位估值又唔平，PE超過40倍，所以現價正路嚟講都唔會有好大上升空間，加上唔夠兩星期差不多升咗個開，阿Man就選擇袋咗先。再睇埋手上幾隻短炒貨CRWV、NBIS算係咁，RDW以為會有10邊上車，結果10.3都要買返注。暫時係NFLX較為弱，要啲時間築底。至於NQ呢，噚晚去到個26550已見支持反彈，暫時又有消息指伊朗收到美國準備解除封鎖嘅「某嘅跡象」，美股三大股指期貨喺亞洲時段中午拉升，NQ喺阿Man執筆時重返26800水平之上。今晚NQ個分水嶺同噚晚一樣26750，支持26650/26550/26450，阻力26850/26950/27050，暫時估計個26950-27050都有啲阻力。

至於港股今朝低開低走，恒生指數低開183點後即失26300呢個頭肩頸線位就繼續向下，早段曾跌397點至26089，剛好去到接近10日線同100日線，暫時初步有支持。半日跌350點或1.32%，報26137；國企指數跌138點或1.55%，報8804；科技指數跌111點或2.19%，報4950。大市成交1229億元，都係偏靜，今年由Q1開始IPO市場活躍，港股好大部資金都走晒去玩新股，令到整體港股市場嘅成交反而少咗。侵侵表示無限期停火，伊朗亦係死剩把口，雙方似乎已無意再戰，市場似乎已適應局勢進入長期拉鋸局面，市場恐慌情緒亦已淡化。只係油價高企令港股裹足不前，望就望霍爾木茲海峽開得返唔再封鎖，等石油供應逐步回復正常，油價都仲要啲時間先可以回落，港股先會有運行。短線港股支持先睇26000至26050，較大支持係25750至25800，至於短線26500仍見阻力，26700至26800阻力更大。

麥狄文

(徐狄怡‧證監會持牌人)