【環宇搜股】港股逃生門終應驗

自上周起筆者短暫轉軚睇好港股，因為實在跌得太過份，踏入六窮月第二日，港股終於有個似樣急彈，執筆時已貼近十天線，即約18884點。

隨著人民幣急跌，轉眼質穿七算大關，本周暫時最低曾貶至7.1395，刷去年11月底半年低位，主要是市場擔心美債務上限問題，資金流入美元避險，強美元下，人民幣自然腳軟，隔山打牛拖累港股。

隨著債務上限問題解決，資金從美元重返股市及債市，美元回落，自自然然人民幣便會反彈，也利好港股。

短期此趨勢應會持續落去，若果恒指企穩十天線，便大有機會上試廿天線(現處19371)，最終目標會19700水平，升到19700要視乎天時與地利，出現概率約三成左右，所謂天時與地利就是睇美金，短期內會否質至102.4，即50天線水平。

不過，此趨勢唔會維持好耐，因為美元調整過後依然會走強，理由是美國經濟走入衰退，資金會擁抱美元。

尤其是隔晚製造業指數連續七個月陷人收縮區，是經濟走入衰退先兆，還有早前Costco CFO早前表示，最近觀察到客人購物習慣已改變，從牛肉轉購豬肉或雞肉(牛肉均價較貴，豬肉雞肉均價較平)，上述情況分別在1999至2000和2008至2010都有出現。

一旦美元再度走強，港股便會再度下跌，下望目標暫睇去年11月11日低位16829，因此本輪反彈是逃生門，也不是牛市重臨。

至於買嘢方向，本欄一直強調挨近100美元(最好更是100美元樓下)收集TLT(iShares 20年期以上美債ETF)，隨著美國債務上限搞掂，美國CDS也急跌，加上美國將要大量發債填補國庫，同時經濟衰退最終引發又喺用減息收場，各方利好因素配合下，買美長債仍是首選。