登入 直接訂購 如何使用?

【盤房來料】兩大經濟命脈開始跪低

隔晚美股又嚟大反彈,多得侵侵「暫緩」3000億美元對華關稅,華爾街又即時被注入興奮劑,美股三大指數升逾1%,納指更升近2%。至於港股夜期及ADR隔晚亦隨美股上升,夜期更一度升至25900水平,呢下咁激多數都係淡倉止蝕盤推上去。

今早恒指當然高開,可惜又係高開低走,日日都係同一個派貨格局。恒指裂口高開436點,見25717點半日高位,其後急回,升幅一度收窄至不足百點,見埋半日低位25378點。中午恒指報收25416點,升135點;國指則升79點,半日報收9926點。

睇番重磅藍籌股,又係騰訊(00700)至厲害,話咗佢係維穩龍頭係勁啲,半日升2.2%。不過集團今日派成績表,派完成績表仲有冇咁威猛就好難講。至於其他重磅股個別發展,中移動(00941)跟友邦(01299)半日倒跌。

由於美國將部分關稅延至12月中實施,當中包括手機、電腦等,明明喺風眼嘅呢兩個重災區,又得到一個喘息機會,相關股份今早造好。舜宇(02382)中期純利增長兩成一,有大行唱好,股價半日升12%,其他手設股跟電腦相關股份,閒閒地升2%以上。侵侵作風飄忽係人都知,趁今日呢個反彈,手上仲有貨嘅,真係好好把握逃生機會。

其實睇番港股兩個經濟命脈嘅板塊,銀行股同地產股,呢期走勢都係每況愈下,好似連跌咗13個交易日嘅中銀香港(02388),出埋奶力今日都只係彈0.7%,日線圖走勢之劣,睇怕係彈番上條10日線都救唔番。至於其他大笨象(00005)同恒生(00011),亦被沽壓困擾,走勢圖同樣咁難睇,就以大笨象為例,之前被視為支持位嘅60元大關,恐怕已變成反彈阻力。百業之母都咁嘅款,大戶沽貨完全唔客氣,睇嚟喺大戶嘅眼中,香港經濟前景就係灰過灰姑娘嘅上半生。

至於另一隻本來會生金蛋嘅金雞地產業務,近日亦開始憔悴得緊要,恒生地產分類指數,已較今年4月初盤中高位累挫逾21%,技術上進入熊市。大摩又出魔笛追魂呢一招,表示中美貿易糾紛不能於短期內解決。其實阿Man都認同,家下關稅只係部分暫緩,又非完全撤回,雙方談判過咗N輪,未見有乜嘢實質成果,雙方要達成共識並非容易。另一方面,香港近期嘅社會事件,亦大大影響港人消費意欲,全年經濟有下行風險。大摩仲表示目前香港正處於內憂外患困局,難以「睇通」下半年樓價走勢。大摩亦指地產股話見底言之尚早,目前並未係撈底好時機。

香港兩大經濟命脈開始腳軟跪低,港股仲點會有運行,即使港股早已被赤化,內地企業佔港股比例愈來愈大,但百業之母再加生金蛋嘅雞都被大戶所嫌棄,又難怪近日港股都係高開低走,又或低開低走,港股想反彈,睇嚟都係有心無力。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。