登入 直接訂購 如何使用?

【盤房來料】汽車光伏又落鑊 資金輪動沽藥股

隔晚美股有啲腳軟,除咗美國疫情反彈情況嚴峻,再有幾個州份封鎖之外,10月零售銷售數據差過預期,反映喺疫情影響下,普羅大眾都唔願使錢,加上新一輪刺激經濟方案無咗影,美股創完收市高位回吐亦正常。不過港股卻跟隨內地股市做好,恒指半日升過百點收市。

恒指高開19點,開市早段好淡爭持,一度倒跌70點,見26344點半日低位,但低位有買盤吸納,大市掉頭回升,最多升202點,見26618點半日高位後回順。半日恒指報收26572點,升157點;國指則升95點,報收10646點;恒科指報收7976點,升43點。

藍籌股個別發展,中移動(00941)為美國制裁軍方背景中資股之一,上周五侵侵簽署行政命令後,連跌幾日未止瀉。領展(00823)高位有回吐,不過短短一個月由60樓下抽升至半年高位,有回吐都好正常。其他藍籌重磅股普遍做好,友邦(01299)創新高90.9元,半日升1.7%;大笨象(00005)半日升0.4%,反彈極都仲係40皮樓下,唔好諗多咗乜嘢聖誕鐘,炒滙豐,呢枝歌仔已無唱好耐。

科技股個別發展,JATMX嘅騰訊(00700)、阿里(09988)跟京東(09618)隨大市回升,不過升幅有限,全部不足1%。但美團(03690)跟小米(01810)就逆市向下,前者仍未公布業績期,不過有大行預測美團第三季業績將較第二季遜色,主要係疫情受控後, 內地社區運作回復正常後,外賣車手人工價格回升,以市民外出用膳增加,令相關送餐業務較第二季強勁表現有所倒退,不過全年增長仍然可觀,加上送餐業務以外其他業務發展理想,業績前股價偏軟反而提供上車機會。至於小米(01810)將於下周派成績表,又係同一邏輯,業績前股價唔炒上係收集機會,博業績後炒上,若然派成績表前急升好似京東(09618)咁,當然有糊唔怕食。

吉利(00175)母公司傳與德國汽車製造商戴姆勒,合作開發下代混合動力汽車引擎,吉利大升8.5%,為升幅最大藍籌。不過吉利喺廿皮樓上層層蟹貨,唔係咁易話上25就上到去,留意有貨睇住22元做止賺。新能源汽車已成大趨勢,Tesla喺美國嗰邊升到嘭嘭升,相對都係做新能源車嘅比亞迪(01211)係落後得緊要,之前講過比亞迪有條神奇10日線,掂親呢條線股價都會再向上。不過上星期呢條十日線不再神奇,但支持位下移至20日線,暫時要買貨吼位10日同20日線之間,即係167元至181元,又係收集好機會。當Tesla股價上升嘅同時,比亞迪遲早會被重估,股價自然水漲船高。

光伏股翻炒,京能(00579)獲母企提私有化,復牌股價半日升5.8%,以私有化消息嚟講,咁嘅升幅唔算勁。其他光伏股均見資金追捧,不過成交唔算配合升勢,未足以令阿Man心動追貨。

資金流入汽車跟光伏股,算係炒環保概念,資金輪流係呢期例牌菜,藥股見資金流出,尤其係CRO相關藥股。剛剛一拆三嘅藥明生物(02963)半日跌3.8%,藍籌中跑第尾。其他金CRO股半日至少跌2%以上,暫時未見跌勢喘定,想撈貨都要睇定啲。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。