登入 直接訂購 課程及教學

【盤房來料】周末前夕交投淡靜 買賣兩閒

雖然台海局勢仍然緊張,但目前總算有驚無險,港股連續兩日反彈,恒指連續兩日反彈484點,今早漸見回吐壓力,恒指仍然受制於10日線(約20291),正處於好淡爭持局面。港股今早高開109點,開市價20283已經係半日高位,相當接近10日線,明顯10日線成為短線阻力。重磅科技股高開後回吐,恒指亦被拖累倒跌77點,見20096半日低位,但沽壓有限下,大市再度回升。恒指中午報收20192,升18點;國指中午報收6890,升11點;科指半日升31點,報4412。大市半日成交只有466.91億元,周末前夕下投資者態度審慎,買賣兩閒。

藍籌股個別發展,長和(00001)跟長實(01113)續後靠穩,半日分別升1.07%及0.46%。友邦(01299)跟港交所(00388)亦微升,但大笨象(00005)半日跌0.39%,但績後股價穩守50元水平之上。至於防守性較高嘅中移動(00941),係阿Man收息嘅心水之選,股價企穩50元,有意揀收息股,中移動穩定現金流係對股東派息嘅保證。

至於科網股高開低走,ATMJ只有美團(03690)半日仍錄得升幅,阿里(09988)雖然交出一份較市場預期理想業績,但仔細睇睇,其實業績表現平平無奇,加上唯一錄得增長嘅雲業務佔整體業績不足一成,而其他業務停滯不前,可見阿里亦逃不過內地經濟放緩嘅影響。

醫藥股今日表現較佳,百濟神州(06160)公布中期業績後顯著造好,半日升9.42%;信達生物(01801)則以溢價配股予合作夥伴賽諾菲,每股作價42.42元(較噚日收市價溢價29.13%),集資24.15億元。信達與賽諾菲達成多項目戰略合作及許可協議,合拓兩款高潛力抗腫瘤藥物SAR408701及SAR444245於中國臨床開發及商業化,信達無需就協議支付任何首付款。消息一度刺激其股價升逾一成,中午升幅收窄,但半日仍升逾6%。其他醫藥股半日普遍做好,板塊有資金流入。

咁快又過咗一星期,雖然周初大市曾因為台海局勢一度失守20000大關,但喺台海局勢仍然緊張下,港股呢兩日又收復20000大關失地,好明顯喺20000樓下,確係有資金趁低吸納,不過喺未有明顯方向下,市場交投仍然淡靜,目前喺20000水平穿梭,加上周末前夕,更加無人願意入場,睇嚟今日整體成交又會少於千億元。

麥狄文
(徐狄怡‧證監會持牌人)

 

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。