盤房來料丨港股反彈20日線料阻力不少

憧憬美伊結束戰爭，國際油價回軟，美股三大指數齊創即市和及收市歷史新高。據一名美國政府高級官員稱，特朗普周五喺白宮戰情室與助手開會約兩個小時，但未就與伊朗潛在協議作最終決定。另外，伊朗外交部表示，當前伊朗並未就核計劃進行談判，亦尚未與美國達成任何最終協議。不過，城堡證券認為，市場低估美伊達成協議、霍爾木茲海峽重開帶動市場全面反彈機會。若海峽7月底前全面恢復航行，將帶動美國10年期債息下降逾12基點，美元料回落0.5%，標指則升1.7%。美國10年期債息一度回升1.38基點至4.461厘，2年期債息降3.7基點至3.988厘；美滙指數曾轉挫0.27%至98.75。紐約期油挫1.73%，每桶收報87.36美元，今早亞洲時段仍於90美元之下。

道指上周五最多升425點，收市略為回順升363點或0.72%，報收51032；標指升16點或0.22%，報收7580；納指升55點或0.2%，報收26972。一周累計，標指升1.4%，為升第九個星期；5月累計，標指升5.3%，納指升8.3%。亞馬遜創辦人貝索斯旗下藍色起源(Blue Origin)、一支重型火箭在美國進行測試時發生爆炸，發射台被燒毀。受事件影響，美國航太概念股普遍急跌，AST SpaceMobile收市急跌14.8%。PL都因為咁，上周五晚一度插到45美元附近，剛好到咗43-45嘅加注位，順利成章加多一注46.4，收市上返51.14，但盤後又穿返50美元，望佢今晚守到45美元，上返50美元樓上行就放心少少。CRWV話咗想跟段永平落車，上周五108同113分別掛沽，結果108盤中走晒，今早亦113沽出餘下所有貨。

至於NBIS同INTC繼續持有，前者230沽咗半，仲有一半等再爆頂；後者無郁過，周五一度高見125，但收市回返十蚊有突，呢隻有心想坐耐少少，但可能都要考慮拎返一半貨出嚟游下水短炒。ONDS沽咗12.8嘅貨，上周五晚喺11.88又上返車，收市又上返13樓上，今晚再睇可唔可以爆多個頂。MU又忍唔住喺980減咗一半貨，盤中一度落返938，一心以為900邊有位再撈返半，結果今早股價已上咗四位數，決定手上嘅貨繼續放飛。今晚最想喺啲太空航天股，全線上返去，另外再睇ONDS點表演破頂。暫時美股仍然一片大好形勢，不過丹麥退休基金

AkademikerPension投資總監Anders Schelde表示，美國太空探索技術公司SpaceX不僅估值被嚴重高估，同時存在災難性公司治理結構，佢斷言即使SpaceX估值合理，仍會將SpaceX列入投資黑名單。不過SpaceX將於本月12日上市，其集資額目標高達700至750億美元，成為美股及全球最大規模IPO。

NQ繼續強勢，今早喺亞洲時段又嚟gogogo，上周五晚雖然曾經穿過30300個分水嶺，但回調壓力有限，結果上返個30300又行過，最高上到接近30600水平，今日能否更上一層樓，就要睇30400企唔企得穩。今晚NQ個分水嶺喺30500，支持30400/30300/30200，上面都係唔估頂，先睇個30500企唔企得穩再算。

睇返港股呢邊，恒生指數連跌三個星期，上周再跌424點，至25182收市，由5月14日高位26844高位計算，最多跌2114點至上周低位24727，相比呢段時間，美國、日本、南韓、台灣等國家地區股市最近都創歷史新高，港股嚴重落後，表現強差人意。雖然恒指多日處於20日線(約25850-25900)之下，甚至已連續多日收市低於250日線(約25650)之下，技術上已步入熊市，但多項技術指標均顯示港股已呈超賣，短線或見技術反彈，上周五即使有MSCI換碼令成交額增加，撇除換碼成交部分，港股仍算大成交配合回升，呈現十字星走勢，未來幾日超賣後反彈亦為合理預期。

今早恒指低開2點，早段表現反覆，早段一度跌8點，低見25174。主要係A股表現較為疲弱，但其後好友重新主導大市，恒指最多回升304點，高見25486，但升勢受制於10日線均25465，升勢略為回順。恒指半日升220點或0.88%，中午收報25402。半日成交1952.38億元，北水淨流入61.87億元。

留意技術反彈或面對重重阻力，首個阻力為10日線約25450-25500，而50日線約25750阻力更大。目前港股仍然弱勢，要扭轉弱勢局面再重拾升勢，至少恒指要重返20日線即25850-25900水平企穩，並進一步收復100日線即26150水平，港股方能完全扭轉劣勢，重拾升軌。一旦反彈遇阻，則留意下方支持，首個支持為24950-25000心理關口，亦為一重要成交密集區，下一支持為上周低位，約24750-24800，如此關再度失守，港股恐怕繼續向下尋底，往3月低位尋找支持。

麥狄文

(徐狄怡‧證監會持牌人)