盤房來料丨港股已屆一年升幅回調黃金比0.618

記憶晶片巨頭美光科技(Micron)交咗一份靚仔成績表，管理層更唱好收入前景，噚日股價一度升近兩成，收市升幅收窄至15.7%，但個別科技股仍偏軟，美股周四個別發展。道指破頂一度升逾800點，但收市前蒸發大部份升幅，僅微升71點或0.14%，報51920；標指跌不足1點或0.01%，報7357；納指連跌四個交易日，跌118點或0.46%，報25358。

蘋果公司宣布調高多項產品售價，以抵消記憶體及儲存晶片成本飆升，股價收市跌6.1%，為表現最差道指成份股。蘋果表示，因應存儲晶片短缺，Mac電腦、iPad所有型號價格均需調升，其中最新的MacBook Neo入門版售價，由原先的599美元加至699美元，受加價影響還包括家用設備如HomePod及Vision Pro。蘋果發言人形容零件價格攀升速度為前所未見。至於阿Man啲短炒倉，CRML幅圖愈睇愈唔對路，見唔係輸太多，9.14走埋啲貨尾單位算數，呢隻炒埋一碟仲要輸少少，搞咗一輪炒了個寂寞。NBIS補返272嗰半注，怕死喺268止蝕咗，但盤中又喺259買返，另外喺250仲有個買盤，瞓醒見中埋，盤後插水穿埋250，今晚上唔返250企好，都要考慮走人，暫時用個230做防守，睇下點。MU相對精彩，1185止賺咗，1148又撈返，擺個1248又食到一嚿水，繼續持有半注喺手，用個1070條10MA做防守。

至於MRVL，270撈嗰半注，見一開市插水，280走晒，但對此股特別鍾情，又死去買返268，盤中上到280，但都瞓鬼咗覺，瞓醒又打回原形，用240做防守，話晒MRVL次次炒佢都順手，希望今次無例外，加上美銀已上調其目標價至365美元，點都要有啲貨喺手。DELL仲有395嘅短炒貨未處理，428止賺後，又喺395買返，暫時喺條20MA十蚊雞上落，防守位380，持有先。INTC上到140都無食糊，盤後又穿返130，呢隻都喺嗰句啦，有美國政府咁大個靠山，加上有負成本貨底，短炒貨103買嘅畀多少少buffer，唔穿110留住先。KLAR慢上中，耐心等佢上去20樓上。

又到星期五，阿Man例牌周末前要鬆一鬆，今晚美股多數睇都唔睇，set好止賺同止蝕盤過happy Friday。NQ有晒波幅炒，今晚周末前夕唔知會唔會靜返少少，無咁大波幅。今晚NQ分水嶺29350，支持29250/29150/29050，阻力29450/29550/29650。除非企穩29650，否則今晚難扭轉今日亞洲時段嘅跌勢。暫時NQ喺29000至30200之間，即係50日線同10日線chok住先，留意29000穿就要提高警覺。

日經指數及道指昨日均再創新高，惟港股跌跌不休，恒指昨日低開23點，見23388已為全日高位所在，其後跌勢持續，最多跌433點至22978低位，其後跌幅略為收窄至335點，報收23076，險守二萬三大關。不過至夜期及ADR時段雖一度反彈逾百點，可惜最後仍偏軟，今早黑期時段於23000邊徘徊。恒指低開124點，報22952，一開市二萬三已無咗影，淡友惡過大爺，半日跌幅最多擴大至558點，低見22518。半日跌432點或1.87%，報22644。暫時大市已由去年低位19260至本年初高位28056呢一段升浪回調咗黃金比嘅0.618，即係22620，唔到呢個位理應會有個反彈，下周一期指結算，睇下係咪結算過後迎來一波反彈。不過港股喺外圍股市節節上升之際，斯人獨憔悴，主要係唔少資金進行配對交易pair tarde，於亞洲區內買入日韓台股份，同時沽出港股，令恒指考驗23000大關。

除非內地推出大規模刺激措施，吸引資金重返港股市場，否則目前資金流向下，港股仍有下調壓力。就算喺22500-22600呢個水平有技術反彈。反彈仍面對重重阻力。首個阻力為22800至23000，下一阻力23400-23500即100周線及5日線水平，至於10日線於24000暫時更為遙不可及，20日線24500-24600亦為下降軌阻力所在，除非大市能重返此水平企穩，再向上逐一收復全部移平均線，否則仍難扭轉目前弱勢，完成反彈後或又再展開另一個跌浪，繼續以一浪低於一浪姿態往下尋底。

麥狄文

(徐狄怡‧證監會持牌人)