【盤房來料】季結日好友攞彩挾淡倉

美股隔晚顯著上升，扭轉三日跌勢，標指更創歷史新高。道指升477點或1.22%，標指升44點或0.86%，納指則升83點或0.51%；反映中概股嘅金龍指數則由跌轉升0.03%。港股今早雖低開，但略為再跌幾十點後，跟隨A股發力，半日一口氣收復多條移動平均線，並重返上升通道底16600之上，完全扭轉昨日弱勢。

恒指今早低開14點，報16378，其後跌幅略擴大至46點，見16345半低位後隨A股回升。在科網股領漲下，大市倒升最多294點，高見16687，半日升267點或1.63%，報16660。國指升125點或2.2%；報5853；恒科指跑贏大市，升129點或3.8%。半日成交額605億元，以長假期前夕嚟講，都算唔錯，但未足夠配合半日逾200點升幅。

重磅科技股成為大市領頭羊，騰訊(00700)噚日一枝獨秀，今日維持升勢，半日升2.1%；阿里巴巴(09988)升3.2%，美團(03690)升7.2%，京東(09618)升6.8%，網易(09999)升近2%。今日發布SU7汽車嘅小米(01810)，半日升2.1%；百度(09888)升4.5%，重返紅底股之列；嗶哩嗶哩(09626)升近一成，績後有追捧。另快手(01024)彈近半成。

金融股個別發展，大笨象(00005)半日升0.7%，但友邦保險(01299)弱勢未改，逆市跌0.1%。中國平安(02318)半日升2.3%，中國人壽(02628)升逾半成，港交所(00388)升0.8%。不過，建行(00939)跌1.2%，工行(01398)及交行(03328)績後亦分別跌1%或2.8%。

其他藍籌股以中升控股(00881)績後升近一成，表現最佳；海爾智家(06690)績後一度升超過8%，半日仍升7.3%；藥明生物(02269)升7.6%。不過碧桂園服務(06098)跌3%，為表現最差藍籌，創科(00669)跌2.4%緊隨其後。電動車股全線向好，理想汽車(02015)升4.7%，比亞迪(01211)升0.7%，蔚來(09866)升3.1%，小鵬(09868)升2.2%，零跑汽車(09863)升5.2%，連恒大汽車(00708)都升逾半成。

港股於季結日大挾淡倉，並一口氣收復多條移動平均線，扭轉昨日劣勢。不過假期前夕，料午後再追貨資金有限，加上未見再有任可利好消息配合，今日純挾淡倉意味甚濃。內地快將公布3月經濟數據，初步估計汽車或零售銷售都唔會有乜嘢起色，房地產市場亦未見顯著改善，但市場已習以為常，預期未必會有太大負面反應，期待內地推出刺激政策，帶動港股於第二季結束連跌四季之頽勢。不過，中港股市最大問題係欠缺外資參與，若然無新資金入場，都係只會區間上落，有波幅，無升幅。

麥狄文

(徐狄怡‧證監會持牌人)