【盤房來料】港股6月開局反彈 但未宜過份樂觀

雖然隔晚美股偏軟，但人民幣止跌反彈，加上財新中國5月製造業PMI重回擴張水平，港股經過五窮月跌1660點後，今早低開高走，半日彈返過百點。升勢主要由重磅科網股帶動，恒科指反彈超過2%。

恒指低開44點，報18190，已經係全日低位，不過內地公布經濟數據後，大市止跌回升，最多升231點，半日最高見18465。中午恒指收報18383，升149點；國指報6220，升56點；恒科指報3698，升71點。半日成交額757.12億元，較近日平均午市成交明顯增加，似乎嚟到呢啲位，開始有啲買盤肯入場買吓貨，如果成交keep到，反彈勢頭可持續。

藍籌股普遍反彈，港交所(00388)半日升2%，友邦(01299)亦錄得1.2%升幅，只係大笨象(00005)唔多爭氣，半日跌0.7%，未有隨大市反彈，而內險及內銀股亦較弱，暫時唔多彈得起。比亞迪(01211)早段下跌，但至中午倒升0.9%。長實(01113)旗下油塘項目將於月內推售，半日升2%，但新地(00016)半日則跌1.3%。藥明生物(02269)半日彈5.4%，藍籌之中表現最好。

科網股係是日反彈浪嘅領頭羊，京東(09618)開始其京東618銷售活動，成績唔錯，銷售暢旺，半日反彈4.5%；阿里(09988)半日亦升1.2%，表現相對弱雞。不過電商嘅增長好明顯已難復當年勇，去年雙十一嘅銷售活動，電商已唔再見到過往咁大鑼大鼓報道銷售再創紀錄，原因就係經過三年疫情，內地嘅消費力已大不如前，電商銷售額當然難如過往般屢破紀錄。其他科網股亦普遍回升，騰訊(00700)跟美團(03690)分別彈3.3%及5.1%，近日強勢嘅東方甄選(01797)，半日再升一成。而金山雲(03896)與貴陽市人民政府、貴安新區管理委員會達成戰略合作，中午大升一成九。

金價回升，金礦股今日全面造好，除咗SPDR黃金ETF(02840)升唔夠1%之外，金礦股半日普遍升3%或以上。但航空股跟內房股未有隨人民幣止跌反彈，南方航空(01055)定向增發A、H股補充資本，半日跌6.2%；東航(00670)連跌七個交易日，跌1.1%；國航(00753)同樣跌足七日，再跌近6%。

港股經過五窮月後，喺6月首個交易日叫有啲反彈，同時成交額亦略見增加，主要係靠人民幣止跌，留意人民幣一旦再回復弱勢，隨時會令中港股市反彈勢頭終止。純以技術走勢睇，呢下反彈先睇返18500回補裂口，下一個裂口喺18900點，而10天線喺18992，相當接近19000水平，若然反彈去到19000水平行人止步再掉頭，咁噚日恒指力守嘅18000水平恐怕不保，捕捉反彈都要小心，唔好對後市太過樂觀。

麥狄文
(徐狄怡‧證監會持牌人)