【盤房來料】港股反彈持續 轉勢則言之尚早

美國債務上限法案通過，雖然小非農超出預期，但聯儲局下月維持息口不變機會大增，美匯指數回落，人民幣持續反彈，離岸價升穿7.1關口，港股大幅反彈，恒指半日升逾600點，目前於10日線(18890點)附近爭持。

恒指高開349點，升幅略縮至331點，見18548半日低位後再度回勇，高開高走愈戰愈勇，半日最多升676點，見18893半日高位，10日線當未企穩，暫於此水平爭持。恒指半日報月收18883，升666點；國指升260點，報收6409；恒科指半日升175點，升幅達4.8%。半日成交額623.09億元，呢個成交額當未能配合半日升幅。

藍籌股全線向上，大笨象(00005)半日升1.6%；友邦(01299)半日升2.7%；港交所(00388)FQ 日升4.1%。內險跟內銀股今日終於識得彈，平保(02318)半日升4.4%；國壽(02628)亦升3%；工行(01398)跟建行(00939)半日則升2.2%及1.6%。

隔晚反映中概股嘅金龍指數勁升超過4%，港股呢邊嘅科網股勁彈，ATMJ全部升超過半成，當中阿里(09988) 旗下阿里雲宣布，發布音視頻AI通義聽悟，半日升逾6%。百度(09888)半日亦升6.1%，快手(01024)半日同樣錄得超過6%升幅。不過嗶哩嗶哩(09626)又係公布業績見光死，首季經調整虧損雖收窄，但股價逆市跌2.7%。

內房股跟物管股，跟隨人民幣反彈回升，龍湖(00960)半日升12%，藍籌之中表現最好，其他內房股普遍錄得半成以上升幅，而物管股亦係閒閒地升半成甚至一成。不過呢個板塊反彈都好，都唔會令阿Man心動想買貨，始終內房被債務問題拖死，加上銷售亦大不如前，呢啲問題唔解決，阿Man都係睇死內房物管股有波幅，冇升幅。

金價再度逼近2000美元大關，金礦股繼續做好，睇好金價，都係直接買金礦股，相關股份半日升超過3%至近9%不等，SPDR金ETF(02840)都係升1.3%，升幅都係跟唔足。

TVB(00511)又重施故技，舉行直播帶貨炒高股價，半日股價急升五成，唔想被割韭菜，呢啲咁嘅暴動股，都係眼看手勿動，食下花生做觀眾算。

噚日都講過6月開局反彈，目前借住人民幣反彈持續反彈勢頭，今日成功回補前日嘅下跌裂口18500，如果能企穩10日線(18890)，有機會進一步再向上回補5月24日所遺下嘅裂口18900-19400。不過20日線19375無咁容易突破，尤其係19400水平已由支持變成阻力，暫時反彈都係一步一步睇，港股轉勢回升言之尚早。
 

麥狄文

(徐狄怡‧證監會持牌人)