【盤房來料】勿迷信大笨象供股價為鐵底

隔晚美股死唔去，本來市場擔心全球疫情再度大爆發，加上多間國際銀行涉及不當交易；而美國大唔少銀行不約而同下調今年的淨利息收入預測，金融股捱沽，道指盤中一度急跌逾900點，其後跌幅收窄，但港股今早繼續下跌，再創三個月低位。恒指低開111點報23839，最多曾跌238點，低見23711點，再創6月15日以嚟低位。不過，跟美股情況相戈似，好彩有科技股力撐住，大市跌幅收窄，跌幅曾收窄至42點，高見23908。恒指半日收造23887，跌63點；國指中午報9652，升12點；科指半日收7307，升111點，跑贏大市。

重磅股大笨象(00005)未識止跌，所謂供股價28元係鐵底，阿Man認為係持貨者一個自欺欺人嘅講法，喺短期之內，都見唔到大笨象有乜方法可以扭轉目前業務頽到爆嘅弱勢，股價有乜嘢理由支持上返去重遊舊地，阿Man就諗唔到喇，半日跌2.6%，創25年低位，似乎係沒有最低，只有更低。其他金融股表現亦麻麻，只有建行(00939)叫喘定，半日微彈0.2%。

人民幣之前嘅強勢有啲行人止步咁款，話咗航空股呢啲靠唔住，高追定必中伏，除咗人仔回軟之外，歐洲國家再爆一波新疫情，仲想搭飛機出國去歐洲掃貨嘅內地土豪，睇嚟都會為咗shopping而去送死。即使內地本身疫情受控，黃金周長頂多都係國內本地遊，內陸機會有幾好賺，大家心中有數。今日整個航空板塊均見下跌，跌幅閒閒地1%以上。

至於諗住趁黃金周撈番筆嘅濠賭股，噚日被大行大潑冷水後，今日沽壓未除，整個板塊都插水，跌幅由3%起跳，只有中場業務佔比較大嘅金沙中國(01928)半日跌少過3%。科技股回勇，不過騰訊(00700)呢期唔覺意入咗中美科技戰風眼中，半日仍要微跌0.1%。估計科技股呢期表現繼續反覆，已難重見上一季升到唔識停，愈升愈有呢個情景。睇嚟科技股呢期將轉為上落市玩法，見跌得急可以撈貨，反彈到咁上下又要落車。除咗平貨之外，科技股呢期都係炒上落，摸住石頭過河。

ASM太平洋(00522)之前傳聞私有化，但已遭公司否認相關計劃，股價早段升抵250日線後遇阻，半日收市仲要失守埋50日線，暫時未宜追入。農夫山泉(09633)被納入恒綜指後。今日開始生效加入港股通，半日升0.7%，錄得四連升，不過股價如未能盡快升破37元企穩，都唔算得上一帆風順，低位有撈貨要睇住市況變化決定跳車與否。

麥狄文
(徐狄怡‧證監會持牌人)