【盤房來料】資金輪流入場炒作動作要快

隔晚美股做好，除咗有關疫苗開發繼續有好消息，最快疫苗可於下月推出市場外，另有消息指拜登將委任前聯儲局儲長耶倫為下屆財長，被喻為鴿派女皇嘅耶倫出任財長，華爾街反應相當正面，三大指數上升。至於港股則憂慮第四波疫情愈爆愈勁，港股隨美股高開百點後，表現反覆。

恒指高開144點，已見半日高位26630點，未能升穿噚日高位26662點，大市掉頭向下，最多跌76點，報26409點半日低位，但10日線(26368)點有支持，港股中午微升，恒指報收26498點，升12點；國指則跌43點，半日收報10622點；恒科指則升53點，報收8142點。

有消息指內地擴大互聯互通，第二上市及未有盈利嘅b仔股將可納入港股通，料可刺激成交，又益咗港交所(00388)，半日升2.4%。而等到頸都長想入港股通嘅阿里巴巴(09988)半日升3.3%、京東(09618)同屬第二上市股份，半日升1.6%。騰訊(00700)靠穩，半日升0.1%，美團(03690)跟小米(01810)，似乎係有資金由呢三隻已有北水坐陣嘅重磅科技股流出，莫非係準備定資金掃稍後或被納入港股通嘅京東、阿里同埋網易(09999)呢啲第二上市股份?其他藍籌股個別發展，來來去去又係資金輪到，無乜特別。

光伏股又再落鑊，事關美國總務署確認拜登當選總統，更啟動交接程序，市場憧憬拜登將推新能源政策，唔同侵侵一向唔重視環保，拜登上場，環保概念股抬頭，新能源汽車炒到甩轆，光伏股亦然。不過呢兩日連啲三四五六七八線嘅光伏股仔都落埋鑊，小心光伏股已炒到尾聲。一個sector嘅炒作周期，通常係先升龍頭股，升到啲質素麻麻嘅龍尾股，十居其九係呢個板塊炒作已到尾聲，唔好貪心諗住食到尾。相反一個板塊調整係先跌質素較差嘅龍尾股，跌到龍頭股都跌定，反映沽盤已接近去蕪存菁，應該係走出谷底嘅時候。

黃金價急挫，今早更跌至超過四個月低位，金礦股捱沽，阿Man之前講咗好多次，黃金價未能企穩1920-1950美元，金價升勢已告一段落，而資金積極喺股市搵食，黃金呢啲避險工具自然無運行。值得留意係近日比特幣升勢強勁，而日圓亦有不俗升幅，睇嚟避險資金寧願揀日圓跟比特幣避險，亦唔願流入黃金。

醫藥股呢期弱過藥煲，若然係無參與任何肺炎疫苗開發嘅藥股，統統要捱沽，暫時呢個板塊避之則吉，醫藥股暫時唔係缸邊友杯茶。純睇一對藍籌藥股孖寶中生製藥(01177)跟石藥(01093)，已經feel 到呢個板塊有幾大鑊，就連拆細嘅藍籌新貴藥明生物(02269)都唔多精神。

大市資金繼續輪動，雖然恒指未見突破，以龜速喺區間內移動上落，缸邊友入場宜以快打慢，短炒撈貨見彈要識沽，靈活走位咪再坐定定喺度，此一時，彼一時，記住依家唔同第二、三季，好多重磅股要坐定定等炒上食糊，家下無呢支歌仔唱，總之單字一個~~快！

麥狄文

(徐狄怡‧證監會持牌人)