【盤房來料】資源股炒起 大市又掉頭

美股上周五腳軟，一來市場擔心疫情影響復甦，但同時聯儲局又可能隨時收水，喺咁嘅情況下，過往因為資金泛濫而撐起嘅資產泡沫，尤其係股市，隨時有機會爆破，已愈來愈多美股專家或大行策略師指美股將迎來較深度調整，調整幅度可能高達10至15%。北韓無啦啦又試射遠程巡航彈，幾個利淡因素夾擊下，港股連彈三個星期後，今日低開低走，半日跌逾500點。

恒指低開320點，報25885點，25886經已係半日高位，其後跌幅持續擴大，收市前一度跌545點，見25660點半日低位，失守20日線(25753)，中午恒指報收25686點，跌519點；國指跌187點，報收9199點；恒科指跌幅最大，跌191點或2.8%，半日報收6557點。

ATMX又要為今日跌市孭起責任，美團(03690)畀評級機構惠譽將佢嘅長期外幣發行人違約評級由BBB下調至BBB-，咁嘅評級咪話唔嚇人，股價半日跌6.3%，不過阿Man上星期講咗，反彈到時阻力位，有撈貨博反彈，有食唔食，只能怪自己貪字得個貧。仲有騰訊(00700)、阿里(09988)跟小米(01810)，半日分別跌3.6%、4.4%及3.2%，反彈完呢兩日又褪返去上落區間下方。其他藍籌股個別發展，以為放寬回港易對濠賭股有利，誰知內地福建又爆一波疫情，今日呢個板塊普遍回落，金沙中國(01928)跟銀娛(00027)齊齊跌逾5%。雖然油價唔係大升，但今日三桶油逆市向上，中石油(00857)亦3.8%表現最好。

外圍資源價格持續向上，資源股今日繼續做好，不過連中廣核礦業(01164)呢啲幾十億市值嘅龍尾股都單日急升兩成過外，真係要提高警覺。同埋唔知點解，餐餐炒到資源股，個市無論係升市或反彈市都會掉頭向下，呢個板塊可以話係大市藍燈籠。化工化肥股今日亦見落鑊，不過見到天德化工(00609)呢啲五六七線股仔都炒高兩成，阿Man當然有戒心，高追當然唔會，連回套亦無打算入場。

啱啱香港話要禁電子煙，立法會已夠票通過，美國FDA又喺呢個時候話要審理電子煙產品，雖然思摩爾(06969)主要係做加熱煙嘅霧化系統，但一般投資者都唔多識分辨電子煙同加熱煙，一概當埋係電子煙產品對待，而喺美國上市嘅同類企業，上周五股價急挫，思摩爾今日亦捱沽，半日跌15.5%。另一重挫股係SOHO中國(00410)，黑石入主交易搞唔掂，今朝開市SOHO中國股價裂口低開近15%後，一度急挫四成，中午跌35%，呢啲情況咪多手去接飛刀。

麥狄文
(徐狄怡‧證監會持牌人)